Hobollada Waaberi Iyo Halganka Ogadeeniya

Habeennimadii Sabtidii ay taariikhdu ahyd November/2/2002 ayaa waxaa magaalada Minneapolis ee gobolka Minnesota e waddanka Mareykanka  lagu qabtey xaflad loogu magacdarrey Habeekii Waaberi Iyo Halganka Ogaadeniya.xafladdas oo uu soo qabanqaabiyey xafiiska Ogaden-American Community ee magaalda Minneapolis waxaa lagu qabtey qolka shirarka ee loo yaqaano Sabatani Community Center,oo ku yaalla koonfurta magaalada Minneapolis

Waxaa xaflada lagu furay qoraal ka hadlaya xaalada ka jirta waddanka Ogaadeenya oo ay soo jeedisey Hodan Ducaale,(Riix Magaca) oo ah ardayad,Qoraal kale oo ay si wada jir ah u soo jeediyeen laba wiil aa la kala yidhaahdo Hirsi Axmed Iyo Xirsi Kaariye (Riix Magaca),Iyo Gabay Ingiriis ah oo ay akhriyeen gabdhaha kala ah Idil Cabdullaahi Ducaale (Riix Magaca)iyo Nimco Cabdi Cali Abshir(Riix Magaca)

Waxaa  hadal kooban ka jeediyey Qareenka sida aadka ah looga yaqaanno magaalada Minneapolis Attorney P G Robbichuad oo u muujiyey shacabkii soomaaliyeed ee halkaasi isugu yimid inuu aad uga xunyaay dhibaatada lagu hayo shacabka Ogaadeeniya. Attorney PG  oo labbisnaa funaanad ay ka muuqato Maapka iyo calanka Ogaadeniya wuxuu gobtaas mas’uuliyiinta jaaliyada Ogaadeeniya ku guddonsiiyey deeq dhaqaale oo ugu deeqay qaddiyada shacabka Ogaadeeniya. Waxaa iyana xaflada ka soo qayb galay deeq dhaqalena halganka ugu deeqay qareemada kala ah Ronald J Theiler iyo Dr.Ronald S.Msh oo dadka ka caawiya dhibaatada ka soo gaadha shilalka baabuurta.

Waxaa billabantey qaybtii aadka loo sugayey ee xaflada oo ahayd hoboolada waaberi. Waxaa ay xaflada ku furen heesta Calanka Ogaadeeniya. Oo uu allifey abwaanka caanka ah e Maxuud C/laahi sigub. Kadib heesta calanka waxaa billaabantey riwaayad uu sameeyay Singub oo loogu magic darey “Aan Is Fahanno” oy ka qayb qaateen hobollada kala ah

1. Maxamuud C/Laahi Singub
2. Mustafa Kiiko
3. Miiraale
4. Cadar Axmed Kaahin
5. Hibo Maxamed (Hiba-Nuura)
6. Salaad Maxamed shardi ( Salaad Darbi)
7. Khadiijo Bokhran
8. Iyo DJ Barkhad

Waxaa goobtaas ay fanaaniitu ku so bandhigeen riwaayad aad loogu bogey oo ay ka soo qayb galeen  tiro laba jeer ka badan dadkii loogu tala galey. Heesaha goobta ku cusbaa ee aadka dadku uga heleen waxaa kamid ahaa Hees uu sameeyey erayadeeda Maxamed Qamaan laxakeedana Mustafa kiiko oo la yidhaahdo Bar-baar baan ka sugayaa oo ay si wada jir ah ugu luqeeyeen Khadiijo Bokhran, Mustafa Kiiko iyo Miiraale Sidoo kale waxaa si aad ah loogu riyaaqey heestii caanka ahayd ee Qabri Daharre anaa iska leh o ay dhawr jeer halkasi ka qaadey Hiba-Nuura. Waxaa halkaasi heesihiisii hore oo aad loogu bogey ka qaadey Salaad M Shardi [Salaad Darbi]. Sidoo kale fanaanka da’da yar ee Miraale ayaa isna heeso si aad ah looga helay goobta ka ciyaarey.

Qaybta xigta ee dadku sida  aadka ah ugu riyaaqeen waxay ahayd dhaanto ay soo bandhigeen dhalinyaro wiilal iyo gabdho isugu jira oo uu hor kacayey abwaanka da’da yar ee Yuusuf-Raan Cabdi Xaaji. Dhinaca kalena waxaa gabayo aad dadku ugu bogeen soojeediyey Abwaan Maxameed C/laahi Singub.

Xaflada waxaa ka soo qayb galey dhamaan bulsha weynta Soomaaliyeed ee gobolka Minnesota oo aan habeenkaas ka hor goob isugu iman tiro intaas la ‘eg . Waxaa goobta xafladau ka dhacayso lagu gadayey funaanado, musawiro, Koobab , Calanderka taariikhda laga eegto iyo farshaxanno kale oo dhamaantood ay ka muuqdaan astaamaha waddanka Ogaadeeniya. Jaaliyada Soomaaliyeed ee gobolka Minnesota waxay habeenkaas muujiyeen taageerada ay u hayaan halganka shacabka Ogadeeniya uu ugu jiro xorriyaddiisa. Waxaa masraxa fannaaniintu taagnaayeen hadheeyey dad qiireysan oo sitaey calanka shacabka Ogaadeeniya iyo astaamaha Jabhada Wadaniga Xoreynta Ogaadeeniya.

Jawiga xafladu wuxuu ku billawdey si nabad galyo ah wuxuuna ku dhamaadey si asluub leh.Waxaa dadka caawinayey oo goobta ka adeegayey xubnaha Ururka Dahalinyarada Ogaadeeniya ee Waqooyiga America.

Waxay masuuliyiinta jaaliyada Ogaadeeniya dadka Soomaaliyeed ee qaatey jinsiyada Mareykanka kula taliyeen inay doorashada dhacaysa November/5/2002 codkooda siiyaan musharaxa xisbiga Dimoqraadiga ; Madaxweyne kuxigeenkii hore ee dalka Mareykanka Walter Mondale oo u tartamaya kursigii uu dhawaan ka geeriyodey Senator Paul Wolestone.

Shariif Dheere  
Ogaden Online
Minneapolis. U.S.A.

Copyright © 1998-2002 OGADEN ONLINE   All Rights Reserved.
This site is created by Ogaden Online.  Reproduction of any material on this site is prohibited without express permission of the site owner and the webmaster.