|
WFP oo
dhimay hawlihii uu ka waday Ogaadeenya
Barnaamijka Cuntada Adduunka ee Qaramada
Midoobay WFP ayaa daboolka ka qaaday inuu
dhimay hawlihii uu ka waday meelaha ay
Abaaruhu waxyeelleeyeen ee Ogaadeenya ka mid
tahay, ka dib markii ay deeq bixiyayaashu
ugu deeqi waayeen lacagihii uu dalbaday.
Bayaan uu WFP soo saaray wuxuu isniintii ku
sheegay inuu dhimayo kala badh hawlihii uu
ka waday Itoobiya, isagoo 163 degmo ku soo
koobay gargaarkii uu gaadhsiin jiray 342
degmo oo ku yaalla Ogaadeenya iyo Itoobiya.
WFP wuxuu caalamka deeqda bixiya ka codsaday
inay ugu yaboohaan 76.4 milyan oo doollarka
Maraykanka ah, si uu ugu quudiyo hooyooyinka
iyo carruurta shan sano ka yar ee dhibaatadu
ka soo gaadhay Abaaraha.
WFP wuxuu sheegay in kaydkii cuntada ee u
yaallay uu aad isu dhimay, sidaas darted
aanay suuragal u ahayn inuu sii wado
gargaarkii uu gaadhsiin jiray hooyooyinka
iyo carruurta dhibaataysan ee nafaqa xumada
ba’ani ka soo gaadhay Abaaraha ka jira
Ogaadeenya iyo Itoobiya.
Barnaamijka Cuntada Adduunka ee WFP wuxuu
sannadkii 2007 sheegay inuu gargaar joogto
ah gaadhsiiyo in ka badan 1.1 milyan oo qof
oo ku nool Ogaadeenya iyo Itoobiya.
WFP, in kastoo uu ku dhawaaqay inuu gargaar
gaadhsiiyo dadwaynaha Ogaadeenya ay Abaaraha
ku tabaaloobay, haddana gargaarkaas intiisa
badan wuxuu gacanta u galaa ciidammada
Itoobiya oo siday rabaan u isticmaala.
Ururrada kale ee samafalka ah ayaa iyagu
diiday inay gargaarka si toos ah ugu
wareejiyaan ciidammada Itoobiya, taasoo
keentay in laga xayiro inay ka hawlgalaan
dalka Ogaadeenya.
Jaaliyada Ogaadeenya ee KA oa fashilisay
xaflad Itoobioya loo qabtay
Jaaliyada Ogaadeenya ee dalka Koonfur Afrika
ayaa si fiican u fashilisay xaflad lagu
qabtay xarunta Baarlamaanka Afrika PAP oo
loogu dabbaal-degayay waxa loogu yeedho kun
guurada taariikhda Itoobiya (millanium).
Munaasabad, oo Itoobiyaanku ugu talagaleen
inay taariikhdooda beenta ah caalamka kaga
dhaadhiciyaan, ayaa isu rogtay goob lagu soo
bandhigo wajiga xaqiiqda ah ee taliska
Itoobiya.
Xubno ka tirsan Jaaliyada Ogaadeenye ee
Koonfur Afrika ayaa xarunta horteeda ku
sameeyay bannaanbax qorshaysan, iyagoo
xubnihii bannaanbaxan fuliyay ay boodhadh
waawayn xabadka iyo dhabarka soo sudheen.
Boodhadhkaas waxaa ku qornaa hal ku-dhagyo
tilmaamaya gabood fallada Itoobiya ku hayso
shacbiga Ogaadeenya iyo sida shacbiga
Ogaadeenya uu xaq ugu leeyahay inuu
xorriyadiisa helo.
Xubnahan, oo taagnaa irrida laga galo
xarunta PAP, ayaa qof kasta oo xarnuta
galaya waxay siinayeen qoraal shan bog ka
kooban oo ka hadlaya qadiyada Ogaadeenya iyo
in Itoobiya ay ka been-sheegayso xaqiiqda,
isla markaana taliska ka jira uu yahay
cadowga dimuqraadiyada iyo nabad ku
wada-noolaanshaha.
Safiirka taliska Addis Ababa u fadhiya dalka
Koonfur Afrika ayaa tallaabadan aad uga
xanaaqay, wuxuuna isku dayay inuu ciidammada
ammaanka ee Koonfur Afrika ka dhaadhiciyo in
bannaanbaxan la kala eryo, hase yeeshee
ciidammada ammaanka ee Koonfur Afrika ayaa
us heegay in bannaanbaxani uu yahay mid
sharci ah.
Mid ka mid ah dadwaynihii bannaanbaxa ka
qayb galayay ayaa intuu u dhawaaday safiirka
Itoobiya oo aad u xanaaqsan, wuxuu ku yidhi
“Waxaan ku baraynaa dimuqraadiyada”.
Ciidammada Suudaan oo ugaadhsanaya
kooxihii inqilaabka isku dayay
Ciidammada Suudaan ayaa wali ugaadhsanaya
kooxihii weerarka kadisada ah ka fuliyay
magaalooyinka Khartuum iyo Ummu Durmaan
dhammaadkii toddobaadka oo ka tirsanaa
Dhaqdhaqaaqa Cadaalada iyo Sinnaanta, oo ah
dhaqdhaqaaq ka soo jeeda gobolka Darfur oo
ay ka jiraan Jabhado badan oo ka soo
horjeeda xukuumadda Khartuum.
Argagax badan ayaa maalintii isniinta ahayd
ku dhacay dadka reer Khartuum, ka dib markii
ay ciidammada ammaanku rasaas ku fureen koox
yar oo ku dhuumanaysay dhismo ku yaalla
badhtamaha suuqa way nee magaalada Khartuum.
Ciidammada ammaanka ee Suudaan waxay sidoo
kale isniintii xabsiga u taxaabeen
hooggaamiye diineedka caanka ah ee lagu
magacaabo Sh Xasan Al-Turaabi, hase yeeshee
waxay haddana sii daayeen markii ay saacado
yar hayeen.
Hoggaamiyahan ayaa lagu tuhmay inuu xidhiidh
la leeyahay hoggaamiyaha Dhaqdhaqaaqa
Cadaalada iyo Sinnaanta Khaliil Ibraahim, oo
ka mid ahaa ardayda Al-Turaabi, isla
markaana la sheegay inay aydaloojiyad
aaminsan yihiin.
Dowlada Suudaan waxay sheegtay inay
weerarkaas u babac-dhigtay, isla markaana ay
jabisay xooggagii weerarka soo qaaday, balse
hoggaamiyaha Dhaqdhaqaaqa Cadaalada iyo
Sinnaanta Khaliil Ibraahim ayaa sheegay in
ciidammadiisu ay mar kale soo rogaal celin
doonaan, wuxuuna tilmaamay in weerarkani uu
ahaa billow oo klaiya.
Dowlada Suudaan ayaa weerarkan ku eedaysay
dalka Chad, isla markaana xidhiidhkii
diblumaasi u jartay, hase yeeshee Chad ayaa
eeddaas ku gacan saydhay.
13 May 2008
Axmed Gaal-Eri
Radioxorio@radioxoriyo.com
Raadioxoriyo@yahoo.com
Radio Xoriyo waxaad ka dhegaysan kartaa
Mawjadda 41 MB ee dhererkeedu yahay 9445
KHZ, iyo internetka http://Radioxoriyo.com
iyo http://Ogaden.com Maalinta Talaadada ah
7:00PM - 8:00PM waqtiga Afrikada Bari
|
