|
Dagaallo lagu jabiyay ciidammada gumaysiga
Labadii todobaad ee u denbeeyay dagaallo
melo kala duwan ku dhex-maray CWXO iyo kuwa
gumaysiga, waxaa ciidammada gumaysiga lagaga
dilay in k abadan 84 askari, waxaa kaloo
lagaga dhaawacay tiro intaas ka badan. Waxaa
sidoo kale laga furtay hub kala duwan,
waxaana faahfaahinta wararkaas Ogaadeenya
nooga soo diray wariyaha halkaas nooga soo
warrama.
25/04/08 cutub ka tirsan CWXO ayaa weerar
mir ah ku qaaday ciidammada gumaysiga ee
fadhigoodu yahay xarunta Jeexdin, waxayna u
gaysteen khasaare aan faahfaahintiisa la
haynin.
22/04/08 waxaa weerar kadiso ah lagu qaaday
ciidammo gumaysigu leeyahay oo ku sugnaa
Boodh-caano, kuwaasoo cagohooda miciinsaday
markii ay rumaysteen inayna u babac-dhigi
Karin CWXO. Lama hayo khasaaraha dhabta ah
ee ciidankaas gaadhay, hase yeeshee waxaa
laga furtay hub badan oo ay meeshii kaga
carareen.
21/04/08 Wadal, oo ka tirsan degmada Dhanaan,
waxaa weerar gaadmo ah loogu gaystay
ciidammo gumaysigu leeyahay oo halkaas
hawlgal u tegay, waxaana laga dilay 3 askari,
5 kalana waa laga dhaawacay.
19/04/08 dagaal ka dhacay Laan-yalax, oo ka
tirsan degmada Dhanaan, waxaa ciidammada
gumaysiga lagaga dilay 2 askari, 3 kalana
waa lagaga dhaawacay.
Isla 19/04/08 dagaal isaguna ka dhacay
Gumarrey, oo ka tirsan degmada Qabridaharre,
waxaa ciidammada gumaysiga lagu gaadhsiiyay
khasaare aan faahfaahintiisa la haynin.
Sidoo kale 19/04/08 cutub ka tirsan CWXO
ayaa weerar mir ah ku qaaday ciidammada
gumaysiga ee fadhigoodu yahay magaalada
Wardheer, waxayna gaadhsiiyeen khasaare aan
faahfaahintiisa la haynin.
17/04/08 dagaal ka dhacay Xanmudhka, oo Fiiq
ka tirsan, waxaa ciidammada gumayisga lagaga
dilay 1 askari, 2 kalana waa lagaga
dhaawacay.
Isla 17/04/08 Maraacaato, oo degmada
Qabridaharre ka tirsan, dagaal ka dhacay
waxaa ciidammada gumatysiga loogu gaystay
khasaare aan faahfaahintiisa la helin.
16/04/08 weerar gaadmo ah ayaa lagu qaaday
ciidammo gumaysigu leeyahay oo hawlgal u
joogay Rooxaale, oo ka tirsan degmada Dhuxun,
waxaana la gaadhsiiyay khasaare aan
faahfaahintiisa la haynin.
15/04/08 dagaal ka dhacay La-helow, oo ka
tirsan degmada Dhuxun, waxaa ciidammada
gumaysiga lagaga dilay 3 askari, 5 kalana
waa lagaga dhaawacay.
Sidoo kale 15/04/08 dagaal isaguna ka dhacay
Sallax-khaliifo, oo ka tirsan degmada Xamaro,
waxaa ciidammada gumaysiga lagaga dilay 5
askari, 7 kalana waa lagaga dhaawacay.
14/04/08 cutub ka tirsan CWXO ayaa weerar
gaadmo ah u gaystay ciidammo gumaysigu
leeyahay oo hawlgal u tegay Daarasalaam, oo
ka tirsan degmada Garbo, waxayna
gaadhsiiyeen khasaare aan faahfaahintiisa la
haynin.
13/04/08 waxaa weerar dhabba-gal ah lagu
qaaday ciidammo gumaysigu leeyahay oo
marayay meesha lagu magacaabo Xidh-libaax,
oo Awaare ka tirsan, waxaana weerarkaas
lagaga dilay in ka badan 15 askari, waxaa
sidoo kale laga dhaawacay 20 askari.
10/04/08 baabuur Uuraal ah oo askari ka
buuxdo ayaa ciidammada gumaysiga Itoobiya
kaga gaddoomay duleedka magaalada Awaare,
waxaana kaga dhintay 35 askari, 20 kalana
way kaga dhaawacmeen.
08, 09 iyo 12/04/08 dagaallo ka dhacay
Aloosane, oo Dhuxun ka tirsan, waxaa
ciidammada gumaysiga lagaga dilay 12 askari,
10 kalana waa lagaga dhaawacay.
07, 08/04/08 weerar mir ah ayaa lagu qaaday
ciidammada gumaysiga ee ku sugan ee
magaalada Gunagado, waxaana weerarkaas
lagaga dilay inta la ogyahay 12 askari, 13
kalana waa lagaga dhaawacay.
06/04/08 Dhanqa, oo ka tirsan degmada Fiiq,
dagaal ka dhacay waxaa ciidammada gumaysiga
lagaga dilay 2 askari, 3 kalana waa lagaga
dhaawacya.
05/04/08 cutub ka tirsan CWXO ayaa weerar
mir ah ku qaaday ciidammada gumaysiga ee
fadhigoodu yahay xarunta Jeexdin, waxayna
gaadhsiiyeen khasaare aan faahfaahintiisa la
haynin.
Dadwayne gumaysigu xidhxidhey
Ciidammada gumaysiga ayaa meelo kala duwan
oo Ogaadeenya ka mid ah ku xidhxidhay
dadwayne rayad ah.
22/04/08 Danbar-wayne, oo degmada Dhanaan ka
tirsan, waxaa lagu xidhxidhay dadka kala ah;
1- Hadhiya Axmed Cali-food
2- Alaafi Cabdi-dhinbil
3- Badri Guhaad iyo
4- Ina Oday oo magaciisa oo buuxa aanaan
haynin
20/04/08 magaalada Wardheer waxay ciidammada
gumaysigu ku xidhxidheen dad ay turadoodu
gaadhayso 15 qof oo shacab, waxaanan
magacyadooda helnay dadka kala ah;
1- Nimco Cumar Aaden
2- Shiino Xasan Garabey
3- Daahir Aw Axmed
4- Maxamud Aw Muxumed
5- Baddal Jinnoole
6- Najax Jinnoole
7- Ardo Hiirad iyo 8 qof oo kale oo
magacyadooda aanaan haynin.
18/04/08 meesha lagu magacaabo Garbo-niijo,
oo Baabili ka tirsan, waxay ciidammada
gumaysigu ku dileen nin shacab ah oo lagu
magacaabo Nuur Cumar Askar. Waxay sidoo kale
isla meeshaas kud haawaceen Wali Maxamed
Xirsi.
Dhinaca kale sida uu noo soo sheegay
wariyaha nooga soo warrama dalka Ogaadeenya
waxaa maalmihii u denbeeyay dalka intiisa
badan ka da’ay roobab waawayn, hase yeeshee
wuxuu tilmaamay in roobabku ayna wali
wada-gaadhin gobollada dalka oo dhan.
Puntland oo qirtay in xubnihii JWXO ee la
dhiibay laga qabtay Gaalkacyo
Maamulka Puntland ayaa si rasmi ah u qiray
in labadii xubnood ee ka tirsan Golaha Dhexe
ee Jabhadda Waddaniga Xoreynta Ogaadeenya ee
dhawaan loo gacan galiyay ciidammada
gumaysiga Itoobiya laga qabtay magaalada
Gaalkacyo.
Madaxa Maamulka Puntland Cadde Muuse ayaa
27kii April 2008 shir uu ku qabtay magaalada
London ee carriga Britain, kaasoo uu kula
hadlay dadwaynaha ka soo jeeda gobollada
Puntland, wuxuu ku sheegay in labadan
xubnood laga qabtay magaalada Gaalkacyo,
gaar ahaan xaafadda Baraxley.
Cadde Muuse ayaa arrintan qiray, ka dib
markii shirka dhexdiisii laga waydiiyay
su’aal ku saabsan waxa ka jira wararka
sheegaya in madax ONLF ah ay Puntland u
dhiibtay xukuumadda Itoobiya.
Cadde Muuse ayaa markii su’aashaas la
waydiiyay, wuxuu ku jawaabay; “Ma aanan
ogayn anigu, nimankana waxaa laga qabtay
Gaalkacyo, xaafadda Baraxley, waxaanan u
malaynayaa inay ku lug-lahaayeen
barnaamijyadii dhawaan Al Jazeera laga sii
daayay oo ku saabsanaa Killinka Shanaad,
kuwaasoo Amxaaradu ka carootay”.
Cadde Muuse waxaa kaloo shirkaas dhexdiisa
looga soo jeediyay eed la xidhiidha inuu
gobollada Puntland Itoobiya u gacan
galinayo, isagoo arrintaas ka jawaabaya,
wuxuu yidhi; “Anaga yaa nagula dardaarmay oo
naga dhaadhiciyay Amxaaro lama heshiin
kartaan, waana inaad col ahaataan
abidkiin….Hadda waan keenayaa Amxaarada,
hadhawna ninka iga denbeeya ayay u taallaa
siduu u saari lahaa”.
Cadde Muuse, in kastoo uu qiray in labadan
xubnood laga qabtay dhulka uu sheego inuu
maamulo, taasoo ka dhigan inuu
dhiibistoodiina ka denbeeyay, haddana wuxuu
si ula-kac ah uga been-sheegay meesha
nimankan laga qabtay oo ahayd magaalada
Garowe ee maamulkiisa xaruntiisa u ah
Radio Xoriyo
29 April 2008
Axmed Gaal-Eri
Radioxorio@radioxoriyo.com
Raadioxoriyo@yahoo.com
Radio Xoriyo waxaad ka dhegaysan kartaa
Mawjadda 41 MB ee dhererkeedu yahay 9445
KHZ, iyo internetka http://Radioxoriyo.com
iyo http://Ogaden.com Maalinta Talaadada ah
7:00PM - 8:00PM waqtiga Afrikada Bari |
