|
Dagaallo lagu waxyeelleeyay ciidammada
gumaysiga
Dagaallada qallafsan e u dhexeeya CWXO iyo
kuwa gumaysiga Itoobiya waxaa toddobaadkii u
denbeeyay ciidammada gumaysiga lagaga dilay
ugu yaraan 62 askari, waxaa sidoo kale laga
dhaawacay inta la ogyahay 16 askari. Waxaa
kaloo ciidammada gumaysiga laga gubay hal
baabuur oo Uuraal ah, sidaas waxaa noo soo
tabiyay wariyaha RX uga soo warrama dalka
Ogaadeenya. Dagaalladaasi waxay u dhaceen
sidatan;
23/03/08 Magaalada Dig waxaa weerar mir ah
loogu gaystay ciidammo gumaysigu leeyahay oo
halkaas hawlgal u joogay, waxaana laga dilay
2 askari.
22/03/08 weerar lala beegsaday kolonyo
baabuur ah oo ay wateen ciidammada gumaysigu
oo marayay meesha lagu magacaabo Darida, oo
Barmiilka u dhaw. Waxaa ciidammada gumaysiga
lagaga dilay inta la ogyahay 5 askari, 7
kalana waa lagaga dhaawacay.
21/03/08 ciidammo gumaysigu leeyahay oo
hawlgal u tagay Fulunfuul, oo Fiiq ka tirsan,
ayaa weerar gaadmo ah lala beegsaday,
waxaana lagaga dilay 5 askari, 9 kalama waa
lagaga dhaawacay.
16/03/08 Higlaley, oo degmada Dhagaxbuur ka
tirsan, waxaa ciidammada gumaysiga lagaga
gubay hal baabuur oo Uuraal ah, kaasoo ay ku
dhinteen in ka badan 50 askari oo saarnaa.
Dhinaca kale 20/03/08 meesha lagu magacaabo
Dhagaxtuur, oo Awaare ka tirsan, waxaa
ciidammada gumaysiga kaga goostay 2 askari.
Ilaa iyo hadda lama oga meesha ay labadaas
askari ku denbeeyeen.
Sidoo kale 19/03/08 Lafa-gumarrey, oo
Yoocaale ka tirsan, waxaa ciidammada
gumaysiga kaga goostay 4 askari, kuwaasoo
aan laga warhaynin jihada ay u goosteen.
Waxyeellooyin gumaysigu u gaystay dadwaynaha
Ciidammada nacabka ah ee gumaysiga Itoobiya
ayaa waxyeellooyin kala duwan u gaystay
dadwayne rayad ah. Waxyeellooyinkani waxay
isugu jiraan xidhay, jidhdil iyo dhac,
waxayna u dhaceen sidatan;
18/03/08 magaalada Dhagaxbuur waxay
ciidammada gumaysigu ku xidhxidheen dad
rayad ah, waxaanan magacyadooda helnay;
1- Aamina Sh Muxumed
2- Maxamuud Xasan Faarax
3- C/risaaq Aqli iyo
4- Fatxa Cabdi Qodax
11/03/08 magaalada Sagag waxay ciidammada
gumaysigu ku xidhxidheen dadka kala ah;
1- Maxamed Daahir Baaruud
2- C/llaahi Mawliid Cali iyo
3- Bilaad Haybe Sugulle
10/03/08 waxay ciidammada gumaysigu
Cawl-ku-dhal ka soo qaqabteen oo ku
xidhxdheen magaalada Dhagaxbuur dad rayad
ah. Dadkan waxay ciidammada gumaysigu sidoo
kale u gaysteen jidhdil iyo dhac, waxayna
kala yihiin;
1- C/llaahi Abshir oo ay 1 Qari ka dhaceen
2- Axmed Maxamuud oo isagana ay 1 Qori ka
dhaceen
3- Maxamuud Dayib oo ay jidhdil ba’an u
gaysteen isla markaana xidheen iyo
4- Aamina Axmed Dhinbiil oo ay ka dhaceen
500 oo Biro oy rabtay inay carruurteed cunto
ugu soo gado.
Ogaadeenya: Dhibaatadii abaaraha oo meel xun
maraysa
Dhibaatadii abaaraha ka jira dalka
Ogaadeenya ayaa meel khatar gaadhay, iyadoo
gobollada qaarkood ay dad iyo xoolaba ku
dhimanayaan, sidaas waxaa ku soo warramaya
wariyaha nooga soo warrama dalka Ogaadeenya.
Dhibaatadu waxay saamaysay inta badan
gobollada Ogaadeenya, iyadoo meelo badan oo
gobollada Ogaadeenya ka mid ah ay biya iyo
baad la’aan darani ka jirto, taasoo keentay
in dadkii iyo xoolihiiba ay dhibaatdu
saamayso oo meelo badan laga soo sheegayo
dad iyo xoolo ku le’day. Waxaa la
saadaalinayaa in masiibo darani ay ka dhici
doonto badiba gobollada Ogaadeenya haddii
aan toddobaadyada soo socda la helin Roobkii
Guga.
Xukuumadda Itoobiya ayaa wali hortaagan
gargaarkii ay ururrada samafalku gaadhsiin
lahaayeen dadwaynaha ku tabaalaysan
Ogaadeenya, iyadoo wali diiddan in ururrada
samafalku ay si xor ah uga hawlgalaan
Ogaadeenya, waxayna nasiib darro beesha
caalamku ku guul darraysatay inay Xukuumadda
gumaysiga Itoobiya ku cadaadiso inay joojiso
xayiraada ay Ogaadeenya ku hayso iyo
gumaadka ay halkaas ka wado.
Toddobaadkii hore ayuu Midowga Yurub in ka
badan 47 milyan oo dollar ugu deeqay sidii
wax loogaga qaban lahaa dhibaatada abaaraha
ka dhashay ee haysta dadyowga ku dhaqan
gobolka Geeska Afrika. Deeqdan ayaa la
gaadhsiin doonaa toddoba dal oo ku yaalla
Geeska Afrika, iyadoo lagu maalgalin doono
mashaariic abaaraha la xidhiidha, hase
yeeshee Midowga Yurub ma soo bandhigin
qorshe uu hubanti kaga dhigayo sidii deeqdan
loo gaadhsiin lahaa dadka u baahan.
Daba-yaaqadii bishii hore ayuu Xafiiska
Xidhiidhka Arrimaha Bani’aadaminamada ee
Qaramada Midoobay ee OCHA ayuu si wayn uga
digay macaluusha ka jirta Ogaadeenya, isagoo
sheegay in ilihii biyuhu ay gudheen baadkii
xooluhu daaqayeena uu yaraaday, ayna adag
tahay sida ay ku badbaadayaan dadka ay
dhibaatadani saamaysay tan iyo inta laga
gaadhayo xilliga Guga oo sida caadiga ah ku
aaddan badhtamah bisha April.
Wargayska Los Angeles Time oo soo
waraystay Ridwaan xassan Saahid
Wargayska caan ka ah ee la yidhaahdo Los
Angeles Times Los Angeles Times oo kamid ah
wargaysyada ka soo baxa wadankan Maraykanka
kuwa ugu cansan aadna lo akhristo ayaa
23-03-08 lagu soo daabacay sawirka “Ridwan
Hassan Sahid” oo ahayd gabadh da,a yar oo u
dhalatay Somalida Ogadenya oo ay ciidamada
gumaysiga Itoobiya ku marjiyeen silig
joornaalka ayaa aad u qaadaa dhigay qisadii
Ridwaan kadib markay ciidamada Ethipia mayd
ahaan uga tageen. Sawirka ayaa waxaa ka
muuqday nabarkii uu siligigii lagu ceejiyay
kaga tagay luqunteeda.
Ciwaanka wargayska ayaa ahaa “dagaalka
Ethiopia oo ay calamku soo daremayaan”
Sidan ayuuna joornaalku hadalka u dhigay
Gabadhan yar ee 17 jirka ah ah ayaa waxay ka
soo dhex toostay maydad aad u fara badan
ayadoo ay afkeeda iyo indheheeduba qudhaanjo
ka buuxsameen
Ridwaan markii ugu horaysay ee ay soo
miyirsatay waxay dareentay dhiig ka
qulqulaya lugunteeda oo uu siligii ay
ciidamada Ethiopia ku ciijiyeen uu kala
gooyay iyo waliba culays aad u badan oo
luqunta ka saaran, laakiin ayadoo Ridwan ka
cabsanaysa ciidamadii mayd ahaanta kaga
tagay inay ku soo noqdaan ayay Ridwaan si
dagdag ah qudhaanjadii indheheeda uga
tirtirtay kadibna indhaha isku qabatay
ayadoo iska dhigaysa mayd si ayna ciidamada
Ethiopia u dhaawactirin
Sida bahalnimada leh ee Ridwaan siliga loogu
ciijiyay iyo sida mucjisada ah ee ay uga
badbaaday Ridwaan ayaa ah qisooyinka ugu
cajiibsan ee kadhacay wadanka Ogadenya ee ay
musiibooyinku ka dhacayaan, musiibooyinkan
oo ay calamku muda badan ka indha laayeen
Mudadii dheerayd ee uu gumaystuhu haystay
shacabka Ogadenya oo tiro ahaan lagu qiyaasi
karo ilaa 4 Million ayay qulqulatooyin iyo
musiibooyin hadheeyeen Ogadenya ayadoo ay
dagaalo kulul dhexmarayeen xoogaga gobanima
doonka ah ee JWXO iyo ciidamada Ethiopia.
.
Boqolaal kamid ah shacabka Ogadenya ayaa
lalaayay kumanaan kalena guryahoodii ayaa
lagabarakiciyay sanadkii lasoodhaafay oo
kaliya, sidaas ooy tahay hadana waxaa adag
in la Ogaado tirada dhabta ah iyo baaxada ay
leedahay dhibaatada kajirta Ogadenya
sababtuna waxay tahay Ethiopia oo haayadaha
caalamiga ah iyo suxufiyiintaba ka
mamnuucday inay tagaan oo ay wax ka ogaadaan
waxa ka dhacaya Ogadenya.
Ridwaan warbixinta ay siisay wariyahanaga
Los Angeles Times ayaa ah wax aad u yar
marka loofiiriyi musiibooyinka ka aloosan
Ogadenya hadh iyo habeenba.
Gabadhan oo aad u yar ayaa marmar maahsanayd
oo isilaawaysa inta uu wariyuhu
waraysanayay. Ridwaan ayaad moodaa inay
luqunteda ku qabto silsilad, balse silsilad
ma ahane waa nabarkii uu reebay siligii
Ridwaan luqunta lagaga marjiyay oo aad
silsilad moodo.
marmar ayay Ridwaaan oohin la ilmaynaysa
inta aan waraysanaynay hadana si
qosolgariirleh ayaa intay is xusuusato ay
ilinta isaga tirtiraysay, waxayna Odhonaysay
“waxaan layaabanahay nolosha an kunoolaan
hayo nooca ay tahay”
Ridwaan waxay ku kortay tuulada Qoriile
ayada iyo sideed walaaladeed ah
Inta ay Ridwaan xusuusato, tuulada ay ku
noolayd waxaa Ciidamada Ethiopia looga
yaqaana cadow aan naxariis lahayn,
Ridwaan waxay tidhi “waxaanu markasta
dareena inaanu gumaysi ku jiro” waxaanu
korray anagoo cabsi wayn ka qabna ciidamada
Ethiopia
Dhibaatada Ogadenya ka tagan waxay la
factirsataa markay Yurubiyaanku ku
gulddaraysteen inay dib u sii gumaystaan
wadamaday gumaysan jireen intii ka danbaysay
dagalkii 2 ee Aduunka.
In muda ah markay Ogadenya hos imaanaysay
Maamulka Ingriiska , waxa Ogadenya lagu
wareejiya gacanta Ethipia ayada oo ayna
dadka Somaalida ah ee deegaanka dagan aan
wax Ogolaansha ah laga haynin, intii intaas
ka danbaysayna halganka xornimadoonka
Ogadenya wuxuu noqday mid qori isu dhiib ah
oo ayna kal guin Jabhadaha ay ka goantahay
inay xoreeyaan Ogadenya.
Ciidamada Ethiopia ayaa ku caanbaxay
gubitaanka tuulooyinka, kufsiga gabdhaha,
khasbida dhalinyarada aan lataba barin inay
dagaalo galiyaan, iyo wliba cunaqabataynya
dhinaca ganacsiga tasoo sababtay sicir barar
iyo cuduro nafaqa dari ah oo ku habsaday
shacabka
”si aaba yeel la,aan ah ayaa shacabka ree
Ogadenya loo ciqaaba” sidasna waxaa yidhi
mid kamid ah cilmi baadhayasha hayada u
ololaysa xuquuqul insaanka waa Human Rights
Watch.
Ridwan waxay tidhi “reerkanagu siyaasadba
lug kuma lahayn” , si kastaba ha ahaatee
Ridwaan waxay ku gashay bishii 6 malin ay
ciidamada Ethiopia ay dadkii oo dhan tuulada
isu soo aruuriyeeen, malintas Ridwaan
Aabeheed wuxuu lajiray xoolaha mana uusan
joogin, hooyadeedna waxay adeeg u aaday
Magaalo u dhow. Ridwaan isla markaas ay
ciidamadu guriga ku soo jabiyeen waxay
dhaqanaysay wajigeeda.
Ridwaan waxay tidhi waxan xususta markay
soogaleen ciidamadu xaafada iyagoo ku
dhawaaqaya waxaad tihiin Jabhada, waxad
Taageertaan Jabhada, isla markaasna waxay
dhac ugu dhaqaaqeen quryihii ayagon waxba
dhafaynin., Ridwaan iyo dadka kale oo aad u
naxsan ayaa yaacay waxyar kadibse waa nala
soo qaqabtay oo laisugu keen keenay
meelbanaan ah, waxayna askartii bilowday
inay magacyo ka akhrinayaan wargqad ay
jaajuusiiny u sooqortay.
”Ruuxna muunan ogayn ruuxa lala bixi doona
lakiin waxaan garanaynay hadii magacaaga loo
yeedho in lagu dilayo” sasna waxaa yidhi
Fatxi Abdulla oo 22 jir ah ahna Ridwan
inaadeerkeed oo ay xaafad kuwada noolaayeen.
Ridwaan aad bay u naxday markii magaceeda
looyeedhay, ayada iyo 10 kamid ah deegaankii
magalada waxaana la geeyay schoolkii tuulada
oo ay ciidamadu u badaleen xabsi dadka lagu
badho laguna jidhdilo.
”hal hal bay noo wadeen” saasna waxaa tidhi
Ridwaan.”Way I haraatiyeen kadibna luquntay
iskaga kay taageen “ sidadsna ridwaan baa
tidhi waxayna racisay “ waligay wax aan
caawiyay hooyadaybaa kajirta” jabhadna
waligay maanan arag”
Subaxnimadii danbe Ridwaan iyo kuwo kaloo
maxbuusiin ah ayaa loo soo qaday Tuulo kale.
”Waxay noo qaraaceen sidii xoolihi oo kale”
maskixiyan waanban u dhimanay waxaan sugayay
inta ay nafta iga jarayaan” erayadaasna waxa
tidhi Ridwaan”
markii aan soo galay magaladii kale isla
markiiba waxaan arkayay ciidamada Ethiopia
oo Dhac ku bilabay tuuladii guryihiina dab
sudhay, maxaabistii wax seexday nagumajirin
habeenkaas, ruux kastana wuu cabsanayay.
Markuu waagu baryay, ayadoon waxba naloo
sharixin askartii waxay bilowday inay na
layso, 2 kamid ah maxaabiistii waxaa laga
soo lalaadiyay geed dhaladii, 2 kalana waxaa
lagu ciijiyay silig.
Jaaliyada Ogadenya oo kulan gaar ah
layeelatay Congressman Donald Payne.
Kadib shirkii ka dhacay magaalada
Minneapolis galabnimadii Isniinta ee ay soo
qabanqaabiyeen Qowmiyadaha dagan Geeska
Africa ee ay dulmiga ku hayso maamulka
gardarada ku caanbaxay ee Ethiopia, waxay
jaaliyada Ogadenya fursad u heshay inay
kulan gaar ah la layeelato xildhibaanka laga
soo doorto gobolka New Jersey ee lagu
magacaabo Congressman Donald Payne.
Kulankan ayaa waxaa jaaliyada Ogadenya
hogaaminayay Oday dhaqameedyada Ogadenya oo
dadaal badan kawada Waqooyiga America, una
guntaday sidii ay bulshadooda dulman
caalamka ula socodsiinlahaayeen.
Oday dhaqameedyadii kulankan ka soo
qaybgalay ayaa waxaa ka mid ahaa cuqaashta
kala ah;
1- Caaqil Maxamud Cunshur
2- Caaqil Sheikh Abdi Yussuf
3- Caaqil Cabdullahi Cabdi yare
Dhinaca Hooyooyinka Ogadenya ayaa waxaa
jaaliyada uga qaybgashay
1- Hooyo Haweeya Xirsi Mahad
Dhinaca siyaasiyiinta waxaa goobjoog ka
ahaa;
1- Mahamed Ahmed Daahir
2- Hodan Abdullahi Duale
Sidoo kale waxaa iyagu goobtaas joogey xubno
ka socda Ururka Dhinaca dhalinyarada
Ogadenya oo ay ka mid ahaayeen;
1- Abdi Bashiir
2- Amran Daahir
3- Carab Mohamed
Xogwaran qoda dheer oo ay is dhafsadeen
Congressman Donald Payne iyo cuqaasha ree
Ogadenya ayaa waxay labada dhinacba isla
qireen dhibaatada baaxada leh ee haysata
shacabka Ogadenya ee ku dhaqan Ogadenia inuu
asal uyahay gumaysiga Ethiopia, daganaansha
laanta Geeska Afrikana inaan xal loo
helaynin ilaa xal loo helo qadiyada
Ogadenya.
Mar uu Donald Payne wax ka tilmaamayay
socdaalkiisii Geeska Afrika uu kusoo maray
gaar ahaan xeryaha qaxootiga Dhadhaab ee ku
yaala waqooyi Bari Kenya ayaa wuxuu mudane
Payne yidhi “waxaan xeryaha qaxootiga kula
soo kulmay dad farabadan oo ka soo barakacay
Ogadenya kadib markay ciidamada Ethiopia
gumaadeen, dhibaato noockasta isugu jirta
ayaa dadkan ka muuqatay balse illaa eegadan
aan idinla hadlayo waxaan xusuustaa oo
qalbigayga ka gu'i la oohintii gabdhihii
yaryaraa ee ree Ogadenya ee aan kula soo
kulmay xeryaha qaxootiga Dhadhaab, Kenya oo
ay faraxumeeyeen ciidamada Ethiopia”
Dhinaca kale mar uu wax ka iftiimiyay heerka
ay qadhiyada Ogadenya marayso iyo sida ay
calamku ula socdaan ayaa wuxuu mudanuhu
yidhi “Qadiyada Ogadenya maanta way soo
dhaaftay markii uu caalamku iska indha tiri
jiray, waxayna maanta hortaalaa bulsha
waynta caalamka, ayadoo lagu khasbanyahay in
xal loo helo Ogadenya hadii kale in Geeska
Afrika nabad waarta laga gaadho ayaa
noqondoonta riyo aan waxba ka jiridoonin”
Talooyin badan oo uu mudanuhu u soo jeediyay
jaaliyada ayaa waxaa laga xusi karaa inuu
yidhi “Qadiyadiinu maanta idinka ayay magan
idiintahay, hadba sida aad ugu talisaan
unbayna noqon, hadaba taladayda ugu danbaysa
waxay tahay marna ha ka cajisina inaad
dadaalkiina sii wadaan illaa aad ka
hananaysaan macaanka midhaha xoriyada oo aan
hubo inuusan jirin shakhsi reer Ogadenya ah
oo wali nasiib u yeeshay xoriyad” wuxuu
intaas raaciyay mudanuhu sida ay uga
go'antahay garabistaagida dulmanayaasha ree
Ogadenya inta uu xaqoodu dhacanyahay ayaguna
ayna qadiyadooda marin habaabinaynin.
Ugudanbayntii waxaa xusid mudan inay
jaaliyada Ogadenya Mudane Donald Payne uga
mahad celisay dadalka dheeriga ah ee uu
mudanuhu galiyay qadiyada ogadenya iyo sida
uu had iyo jeer ugu heelanyahay inuusan
indhaha ka laabanain markasta oo ay
xafiiskiisa soo gaadho dhibaatada shacabka
Ogadenya, hadiyadan ayaa waxaa mudnaha si
maamuus ahaana u gudoonsiiyay Caaqil
Maxamuud Cunshur.
25 March 2008
Axmed Gaal-Eri
Radioxorio@radioxoriyo.com
Raadioxoriyo@yahoo.com
Radio Xoriyo waxaad ka dhegaysan kartaa
Mawjadda 41 MB ee dhererkeedu yahay 9445
KHZ, iyo internetka http://Radioxoriyo.com
iyo http://Ogaden.com Maalinta Talaadada ah
7:00PM - 8:00PM waqtiga Afrikada Bari |
